SAFF Final: இந்தியாவை வீழ்த்தி கோப்பையை வென்றது மாலத்தீவுகள் அணி!!

தெற்காசிய கால்பந்து சாம்பியன்ஷிப் தொடரின் இறுதிப்போட்டியில், மாலத்தீவுகள் அணி 2-1 என்ற கோல் கணக்கில் இந்தியாவை வீழ்த்தி கோப்பையைக் கைப்பற்றியுள்ளது.

12வது தெற்காசிய கால்பந்து சாம்பியன்ஷிப் போட்டி வங்காளதேசத்தில் நடைபெற்றது. 7 அணிகள் பங்கேற்ற இந்தத் தொடரின் அரையிறுதிப் போட்டியில், மாலத்தீவுகள் அணி 3-1 என்ற கோல் நேபாளம் அணியையும், இந்திய அணி 2-1 கோல் கணக்கில் பாகிஸ்தான் அணியையும் வீழ்த்தி இறுதிப்போட்டிக்கு முன்னேறின.

இதையடுத்து, இன்று நடைபெற்ற இறுதிப் போட்டியில் இந்தியா-மாலத்தீவுகள் அணிகள் மோதின. ஆட்டத்தின் 19வது நிமிடத்தில் மாலத்தீவுகள் அணியின் இப்ராஹீம் மஹுதீ கோல் அடித்து, அந்த அணிக்கு முன்னிலைப் பெற்றுத்தந்தார்.

இதையடுத்து, ஆட்டத்தின் இரண்டாவது பாதியின் 66வது நிமிடத்தில் மாலத்தீவுகள் அணியின் அலி பசிர், மற்றொரு கோல் அடித்து இந்திய அணியைத் திணறடித்தனர். இந்திய அணியின் தோல்வி ஓரளவு உறுதியான நிலையில், கூடுதல் நிமிடத்தில் இந்திய அணியின் சுமீத் பாசி இந்திய அணிக்கு கோல் ஒன்றை அடித்தார்.

இருப்பினும், சிறிய அணியான மாலத்தீவுகள் அணியிடம் 2-1 என்ற கோல் கணக்கில் பரிதாபமாக தோல்வியடைந்தது. இதன்மூலம் மாலத்தீவுகள் அணி தெற்காசிய கால்பந்து கோப்பையைக் கைப்பற்றி சாதனைப் படைத்துள்ளது.