ஹாக்கி: முன்னாள் இந்திய கேப்டன் சர்தார் சிங் ‘திடீர்’ ஓய்வு!

புதுடெல்லி: இந்திய ஹாக்கி அணியின் முன்னாள் கேப்டன் சர்தார் சிங், இளைஞர்களுக்கு வழிவிடும் நோக்கில் ஓய்வு பெறுவதாக அறிவித்துள்ளார்.

இந்திய ஹாக்கி அணியின் முன்னாள் கேப்டன் சர்தார் சிங், இவர், கடந்த 2006ல் பாகிஸ்தான் அணிக்கு எதிரான சர்வதேச போட்டியில் இந்திய அணிக்காக அறிமுகமானார். அப்போது முதல், முக்கியமான இந்திய நடுக்கள வீரராக உள்ளார்.

இளம் இந்திய கேப்டன்:
சுமார் 350 சர்வதேச போட்டிகளில் பங்கேற்றுள்ள சர்தார் கடந்த 2008 முதல் 2016 வரையிலான எட்டு ஆண்டுகள் இந்திய அணியின் கேப்டனாக இருந்தார். அப்போது இந்திய ஹாக்கி அணியை வழிநடத்திய இளம் இந்திய கேப்டன் என்ற பெருமை பெற்றார்.

பத்ம விருது:
இவர் கடந்த 2012ல் அர்ஜூனா விருதும், 2015ல் பத்ம் ஸ்ரீ விருதும் வென்றுள்ளார். தவிர, இந்தியாவுக்காக இரண்டு ஒலிம்பிக் போட்டிகளில் பங்கேற்றுள்ளார்.

காரணம் என்ன?
ஆசிய போட்டிகளின் வெண்கலம் வென்று ஏமாற்றம், வரும் 2020ம் ஆண்டுக்கான ஒலிம்பிக் போட்டிகளுக்கு நேரடியாக தகுதி பெறும் வாய்ப்பை தவறவிட்டது, வயது, வேகமின்மை உள்ளிட்ட காரணத்தால் இவர் சர்வதேச அளவில் இருந்து ஓய்வு பெறும் முடிவை எடுத்ததாக தெரிவித்துள்ளார்.

திடீர் பல்டி:
ஆனால், ஜகார்த்தாவில் நடந்த ஆசிய போட்டிகளின் போது 2020ம் ஆண்டுக்கான ஒலிம்பிக் போட்டிகளில் பங்கேற்பேன் என சர்தார் தெரிவித்திருந்தார். இந்நிலையில் சர்தார் ஓய்வை அறிவித்தது ஆச்சரியத்தை ஏற்படுத்தியுள்ளது .

இதுகுறித்து சர்தார் கூறுகையில், ‘நான் சர்வதேச ஹாக்கியில் இருந்து ஓய்வுபெற முடிவு செய்துள்ளேன். என் வாழ்நாளில அதிகளவிலான போட்டிகளில் பங்கேற்றுவிட்டேன். 12 ஆண்டுகள் என்பது மிக நீண்ட பயணம். தற்போது இளம் வீரர்களுக்கு வழிவிட வேண்டிய நேரம்.’ என்றார்.