ஜப்பான் ஓபன்: பி.வி.சிந்து, பிரனாய் வெற்றி

ஜப்பான் ஓபன் பேட்மிண்டன் போட்டியில் இந்திய வீராங்கனை பி.வி.சிந்து முதல் சுற்றில் வெற்றி பெற்று அடுத்த சுற்றுக்கு முன்னேறியுள்ளார்.

ஜப்பான் ஓபன் பேட்மிண்டன் போட்டி டோக்கியோ நகரில் செப்டம்பர் 11 முதல் 16 வரை நடக்கிறது. இதில் பெண்கள் ஒற்றையர் பிரிவு முதல் சுற்று ஆட்டத்தில் இந்திய வீராங்கனை பி.வி.சிந்து ஜப்பான் வீராங்கனை சயாகா தகஹாசியை எதிர்த்து விளையாடினார்.

போட்டியை அதிரடியாகத் தொடங்கிய சிந்து 21-17 என முதல் செட்டை வசப்படுத்தினார். அடுத்த செட்டை 7-21 எனக் கைப்பற்றி அதிர்ச்சி அளித்தார் தகஹாசி. வெற்றியைத் தீர்மானிக்கும் அடுத்த செட்டில் மீண்டும் எழுச்சி கொண்டு விளையாடிய சிந்து அந்த செட்டில் 21-13 என எளிதாக வென்றார்.

இதன் மூலம் இப்போட்டியில் 21-17, 7-21, 21-13 என்ற செட் கணக்கில் வெற்றியைப் பதிவுசெய்த சிந்து இரண்டாவது சுற்றுக்கு முன்னேறியுள்ளார். இதேபோல ஆண்கள் ஒற்றையர் பிரிவு முதல் சுற்றுப் போட்டியில் இந்திய வீரர் பிரனாய் இந்தோனேஷியாவின் ஜோனத்தன் கிறிஸ்டியை 21-18, 21-17 என நேர் செட்களில் வீழ்த்தி அடுத்த சுற்றுக்குத் தகுதிபெற்றார். ஜோனத்தன் அண்மையில் நடந்து முடிந்த ஆசிய விளையாட்டு போட்டியில் தங்கப்பதக்கம் வென்றவர் என்பது குறிப்பிடத்தக்கது.