ஆசிய விளையாட்டு: பதக்க எண்ணிக்கையில் இந்தியா புதிய சாதனை

இந்தோனேஷியாவில் நடைபெறும் ஆசிய விளையாட்டுப் போட்டியில் இந்தியா இதுவரை இல்லாத அளவு பதக்கங்களைக் குவித்து சாதனை படைத்துள்ளது.

18வது ஆசிய விளையாட்டு போட்டிகள் இந்தோனேஷியா நாட்டின் ஜகர்தா மற்றும் பால்ம்பேங் நகரங்களில் ஆகஸ்டு 18 முதல் செப்டம்பர் 2 வரை நடைபெறுகிறது.

இதில் இந்திய வீரர் வீராங்கனைகள் இதுவரை மொத்தம் 68 பதக்கங்களைக் குவித்துள்ளனர். இன்று நடைபெற்ற 49 கிலோ எடைப்பிரிவு குத்துச்சண்டைப் போட்டியில் இந்திய வீரர் அமித் பங்கல் தங்கம் வென்றபோது நடப்பு ஆசிய விளையாட்டுப் போட்டிகளில் இந்தியாவின் பதக்க எண்ணிக்கை 66 ஆக உயர்ந்தது.

அமித் பங்கலைத் தொடர்ந்து பிரிட்ஜில் மற்றொரு தங்கமும் ஸ்குவாஷ் போட்டியில் வெள்ளியும் கிடைத்துள்ளது. இதுவரை 15 தங்கம், 24 வெள்ளி, 29 வெண்கலம் உட்பட 68 பதக்கங்களை இந்தியா வென்றுள்ளது.

இதன் மூலம் 2010ஆம் ஆண்டு 65 பதக்கங்களை வென்ற சாதனையை முந்தி புதிய சாதனை படைத்துள்ளது.