சாதனைகளை மட்டுமல்ல, மதுக்கடைகளையும் அடித்து நொறுக்கியுள்ளார் ஹிமா தாஸ்!!

தடகள போட்டியில் தங்கம் வென்ற இந்திய வீராங்கனை ஹிமா தாஸ், தனது சொந்த ஊரில் செயல்பட்டு வந்த மதுக்கடைகளை மூடுவதற்கு நடவடிக்கைகள் மேற்கொண்டதாக தகவல் வெளியாகி உள்ளது.

பின்லாந்தின் தாம்ப்ரேவில், 20 வயதுக்கு உட்பட்டோருக்கான உலக தடகளப் சாம்பியன்ஷிப் போட்டிகள் நடந்து வருகிறது. இதில் இந்தியா சார்பில், அஸ்ஸாமைச் சேர்ந்த விவசாயி மகள் ஹிமா தாஸ் பங்கேற்றுள்ளார்.

இதன் 400 மீ., ஓட்டப்பந்தயத்தில், ஹிமா தாஸ் பந்தய தூரத்தை 51.46 வினாடிகளில் கடந்து, தங்கப்பதக்கம் வென்று, தடகள போட்டியில் முதல் தங்கப்பதக்கம் வென்ற இந்தியர் என்ற வரலாற்றுச் சாதனைப் படைத்தார்.

இதையடுத்து ஹிமா தாஸை இந்திய பிரதமர் நரேந்திர மோடி, அமிதாப் பச்சன், விளையாட்டுத் துறை அமைச்சர் உள்ளிட்ட பலரும் பாராட்டி வருகின்றனர். இதனிடையே, ஹிமாவின் வெற்றி குறித்து பேசிய அவரது கிராம மக்கள், ஹிமா பல்வேறு சமூக பிரச்சனைகளுக்கு குரல் கொடுப்பார் எனவும், மிகவும் ஆக்ரோஷமானவர் என்றும் தெரிவித்துள்ளனர்.

தொடர்ந்து பேசிய அவர்கள், ஹிமா அவரது சொந்த ஊரிலும், அருகிலுள்ள கிராமங்களிலும் மதுக்கடைகளை ஒழிப்பதற்கு பல முறை குரல் கொடுத்தாக அந்த கிராம மக்கள் பெருமிதத்துடன் தெரிவித்துள்ளனர்.