FIFA World Cup: தோல்விக்குப் பின் அறையை சுத்தம் செய்துவிட்டு சென்ற ஜப்பான் வீரர்கள்!!

பீபா உலகக்கோப்பைத் தொடரிலிருந்து வெளியேறிய ஜப்பான் வீரர்கள், வீரர்கள் அறையை ஒரு குப்பை தூசி இல்லாமல் மிகவும் தூய்மையாக சுத்தம் செய்து, போட்டி நடத்தும் ரஷ்யாவுக்கு நன்றி குறிப்பையும் விட்டுச் சென்றுள்ளனர்.

விளையாட்டு உலகின் மிகப்பெரிய திருவிழாவாக கருதப்படும் பீபா கால்பந்து உலகக்கோப்பை கடந்த சில வாரங்களுக்கு முன் துவங்கியது. 32 அணிகள் பங்கேற்ற இந்த உலகக்கோப்பையில், குரூப் சுற்றுகள் முடிவடைந்து தற்போது நாக் அவுட் சுற்றுகள் நடைபெற்று வருகின்றன.

நேற்று நடைபெற்ற காலிறுதி போட்டிக்கான நாக் அவுட் சுற்றில், பலம் வாய்ந்த பெல்ஜியம் அணியும், ஆசியாவின் பலம் வாய்ந்த அணியான ஜப்பான் அணியும் மோதின. இதில், ஜப்பான் அணி, முதல் 2 கோல்களை அடித்து பெல்ஜியம் அணிக்கு அதிர்ச்சியைத் தந்தது. இருப்பினும், மனம் தளராமல் ஆடிய பெல்ஜியம் வீரர்கள் அடுத்தடுத்து கோல் அடித்து, 2-2 என போட்டியை சமநிலைக்கு கொண்டு வந்தனர்.
இதைத் தொடர்ந்து, ஆட்டத்தின் கூடுதல் நேரத்தில் பெல்ஜியம் அணி கோல் அடித்து, 3-2 என்ற கோல் கணக்கில் ஜப்பான் அணியை வீழ்த்தி, திரில் பெற்றது. இந்த வெற்றியின் மூலம், பெல்ஜியம் அணி காலிறுதிக்கு முன்னேறியது.

இந்நிலையில், போட்டியை விட்டு வெளியேறிய ஜப்பான் அணி வீரர்கள், தங்கள் டிரஸ்ஸிங் ரூம் எனப்படும் வீரர்கள் ஓய்வு அறையை முழுமையாக சுத்தம் செய்து கொடுத்து விட்டு சென்றுள்ளனர். மேலும், போட்டியை நடத்திய ரஷ்யாவுக்கு நன்றி தெரிவிக்கும் வகையில், நன்றி குறிப்பு ஒன்றையும் அவர்கள் விட்டு சென்றுள்ளனர்.

இதேபோல், ஜப்பான் அணி ரசிகர்கள் தங்கள் அணி தோல்விக்குப் பின்னும், மைதானத்தில் இருந்த குப்பைகளை அகற்றியது அனைவரையும் நெகிழவைத்துள்ளது.