இந்திய கால்பந்து வீரர்களை ஆசிய போட்டிக்கு அனுமதிக்காத இந்திய ஒலிம்பிக் சங்கம்!!

ஆகஸ்ட் 18 ஆம் தேதி நடைபெற உள்ள ஆசிய போட்டிகளில், இந்திய கால்பந்து அணி பங்கேற்பதற்கு இந்திய ஒலிம்பிக் சங்கம் மறுப்பு தெரிவித்துள்ளது.

இந்திய கால்பந்து வீரர்கள், கடந்த சில ஆண்டுகளில் பல்வேறு சாதனைகளை செய்துள்ளனர். அவர்கள் தங்கள் கடுமையான உழைப்பால், மூன்று ஆண்டுகளுக்கு முன் பீபா தரவரிசையில் 173வது இடத்தில் இருந்த இந்திய அணியை தற்போது 97வது இடத்திற்கு முன்னேற்றியுள்ளனர்.

அவர்கள் என்னதான் தங்கள் நாட்டிற்காக மிகுந்த அர்பணிப்புடன் விளையாடினாலும், ரசிகர்களின் ஆதரவு என்னவோ கிரிக்கெட் விளையாட்டிற்கு மட்டுமே இருந்தது. இதனிடையே, இந்திய கால்பந்து அணியின் கேப்டன் சுனில் சேத்ரி, மைதானத்திற்கு வந்து தங்களுக்கு ஆதரவு கொடுக்கும்படி வேண்டுகோள் விடுத்தார்.

அவரின் வேண்டுகோளை ஏற்ற ரசிகர்களும், அரங்கத்தை நிரப்பி, இந்திய அணிக்கு முழு ஆதரவை வழங்கினார். அதன்பின், இந்திய அணி இன்டர்காண்டினெண்டல் கோப்பையை வென்று சாதனையும் படைத்தது.

இதைத் தொடர்ந்து, இந்திய கால்பந்து அணி ஜகர்த்தாவில் ஆகஸ்ட் 18 ஆம் தேதி நடைபெறும் ஆசியா விளையாட்டுகளில் பங்கேற்க தயாராகி கொண்டிருந்தது. வீரர்களுக்கு சீருடைக்கான அளவீடுகளும் எடுக்கப்பட்டன.

இந்நிலையில், இந்திய ஒலிம்பிக் சங்கம், இந்திய கால்பந்து அணியை ஆசிய போட்டிகளில் விளையாட அனுமதி மறுத்துள்ளது. இது குறித்து தெரிவித்துள்ள, தரவரிசையில் 1 முதல் 8 வது இடத்தில் உள்ள அணிகளை மட்டுமே அனுப்ப வேண்டும் என விதி உள்ளதாக இந்திய ஒலிம்பிக் சங்கம் தெரிவித்துள்ளது.

ஆனால், கால்பந்து ஒரு சர்வதேச விளையாட்டு, அதில் மொத்தம் 212 நாடுகள் உள்ளன. ஆசியாவில் ஒரு சில அணிகள் மட்டுமே கால்பந்தில் சிறப்பாக விளையாடி வருகின்றன என விளக்கமளித்த பின்னும், இந்திய ஒலிம்பிக் சங்கம் அவர்களின் கோரிக்கையை ஏற்க மறுத்துள்ளது.

இந்திய கால்பந்து அணி வீரர்கள், சர்வதேச அரங்கில் இந்திய அணியை கொண்டு செல்ல வேண்டும் என்பதற்காக, தங்கள் முழுத் திறமையையும் வெளிப்படுத்தி விளையாடி வரும் நிலையில், இந்திய ஒலிம்பிக் சங்கம், கால்பந்துக்கு முற்றிலும் பொருந்தாத காரணத்தை வைத்துக் கொண்டு வீரர்களை விளையாட அனுமதிக்காதது அனைவரையும் அதிர்ச்சியடைய செய்துள்ளது.