ஆண்களுக்கான ஹாக்கி சாம்பியன்ஸ் தொடா் நெதா்லாந்தில் இன்று தொடங்கி உள்ளது. இந்த தொடரில் இந்தியா, பாகிஸ்தான், அர்ஜென்டினொ, ஆஸ்திரேலியா, பெல்ஜியம், நெதா்லாந்து ஆகிய 6 அணிகள் இடம் பெற்றுள்ளன. இன்று நடைபெற்ற முதல் லீக் போட்டியில், தரவரிசைப்பட்டியலில் 6வது இடத்தில் உள்ள இந்தியாவும், 13வது இடத்தில் உள்ள பாகிஸ்தான் அணியும் மோதின.
மிகவும் விறுவிறுப்புடன் தொடங்கிய இப்போட்டியில் தொடக்கம் முதலே இந்தியா தனது ஆக்ரோஷமான ஆட்டத்தை ஆடியது. ஆட்டத்தின் இரண்டாவது கால் பகுதிநேர ஆட்டத்தில் இந்தியாவின் ராமன்தீப் சிங் முதல் கோல் அடித்து இந்தியாவின் கோல் கணக்கை தொடங்கி வைத்தாா்.
தொடா்ந்து சிறப்பாக விளையாடிய இந்தியா ஆட்டத்தின் கடைசி 15 நிமிடத்தில் தனது ஆக்ரோஷத்தை வெளிப்படுத்தியது. கடைசி 15 நிமிடங்கள் என்ற நிலையில் இந்தியாவின் தில்பிரீத், மந்தீப் தலா ஒருகோல் அடித்தனா். இதனால் இந்தியா தொடா்ந்து 3-0 என்ற கோல் கணக்கில் முன்னிலை வகித்தது. மேலும் ஆட்டத்தின் கடைசி நிமிடத்தில் ரமந்தீப் தன் பங்கிற்கு ஒரு கோல் அடித்தாா். இதனால் இந்தியா 4-0 என்ற கணக்கில் வெற்றி பெற்றது.
இறுதி வரை போராடிய பாகிஸ்தான் அணியால் ஒரு கோல் கூட அடிக்க முடியவில்லை. இந்நிலையில் நாளை நடைபெறும் ஆட்டத்தில் இந்தியா அர்ஜென்டினாவை எதிா் கொள்கிறது.
Mobile AppDownload Get Updated News