அர்ஜென்டினாவுடன் போராடி டிரா செய்தது ஐஸ்லாந்து!!

பீபா உலகக்கோப்பையில், அர்ஜென்டினா-ஐஸ்லாந்து அணிகளுக்கு இடையே நடைபெற்ற போட்டி, 1-1 என்ற கோல் கணக்கில் டிராவில் முடிந்துள்ளது.

பீபா கால்பந்து உலகக்கோப்பை கடந்த ஜூன் 14 ஆம் தேதி, ரஷ்யாவில் கோலாகலமாக தொடங்கியது. இன்று நடைபெற்ற போட்டியில், ‘டி’ பிரிவில் உள்ள அர்ஜென்டினா அணியும், ஐஸ்லாந்து அணியும் மோதின. உலகின் முன்னணி கால்பந்து வீரர்களில் ஒருவராக திகழும் மெஸ்ஸி பங்கேற்கும் போட்டி என்பதால், இப்போட்டி குறித்த எதிர்பார்ப்பு ரசிகர்கள் மத்தியில் அதிகமாக இருந்தது.

பீபா தரவரிசையில் 5 ஆம் இடத்தில் உள்ள அர்ஜென்டினா அணியில் மெஸ்ஸி, மேக்ஸிமிளியானோ மேசா, பாலோ டிபிலா போன்றோர் மிக முக்கிய வீரர்களாக பார்க்கப்பட்டனர். அதேபோல் தரவரிசையில் 22 ஆம் இடத்தில் உள்ள ஐஸ்லாந்து அணியில் கில்பி சிகுர்ட்சன் மற்றும் ஆரன் குனர்சன் உள்ளிட்டோர் சிறப்பாக விளையாடுவார்கள் என எதிர்பார்க்கப்பட்டது.
அணி விவரம்:
அர்ஜென்டினா: Caballero; Salvio, Otamendi, Rojo, Tagliafico; Biglia, Mascherano; Meza, Messi, Di María; Aguero.
ஐஸ்லாந்து: Halldórsson; Árnason, Saevarsson, R.Sigurdsson, Magnusson; Gudmundsson, Gunnarsson, Hallfredsson; Bjarnason, Finnbogason, G.Sigurdsson. இதைத் தொடர்ந்து நடைபெற்ற ஆட்டத்தில், அர்ஜென்டினா அணியின் சர்ஜியோ அகுரோ 18வது நிமிடத்தில் அற்புதமான கோல் அடித்து அர்ஜென்டினா அணிக்கு முன்னிலைப் பெற்றுத் தந்தார். அந்த கோல் அடிக்கப்பட்ட அடுத்த 5 நிமிடங்களிலேயே, ஐஸ்லாந்து அணியின் அல்பீரோ பின்னகோபோசன் அசத்தாலான கோல் அடித்து ஆட்டத்தை சமன் செய்தார். முதல் பாதி முடிவில் இரு அணிகளும் 1-1 என சமநிலையில் இருந்தன.
இதையடுத்து நடந்த இரண்டாவது பாதி ஆட்டத்தில், அர்ஜென்டினா அணியின் கோல் அடிக்கும் முயற்சிகள் அனைத்தையும் ஐஸ்லாந்து அணி போராடி தடுத்தது. ஒரு கட்டத்தில் ஆட்டத்தின் 64வது நிமிடத்தில், அர்ஜென்டினா அணிக்கு பெனால்டி வாய்ப்பு கிடைத்தது . அப்போது, உலகின் முன்னணி வீரராக கருதப்படும் மெஸ்ஸி அடித்த ஷாட்டை, ஐஸ்லாந்து அணியின் கோல் கீப்பர் ஹென்ஸ் ஹால்டர்சன் அற்புதமாக தடுத்தார். இறுதியில், இரு அணிகளும் கோல் அடிக்க முடியாததால் ஆட்டம் 1-1 என்ற கோல் கணக்கில் சமனில் முடிந்தது. மிகவும் எதிர்பார்க்கப்பட்ட மெஸ்ஸி கோல் எதுவும் அடிக்காததால் ரசிகர்கள் மிகவும் ஏமாற்றமடைந்தனர்.