கூலித்தொழிலாளி மகள் தங்கபதக்கம் வென்று சாதனை!

குமரியை சேர்ந்த கூலித்தொழிலாளியின் மகள் தேசிய அளவிலான தடகள போட்டியில் இரு தங்கபதக்கம் வென்று சாதனை படைத்துள்ளார்.

கன்னியாகுமரி மாவட்டம் திங்கள்சந்தை அருகே மூலச்சன்விளையை சேர்ந்தவர் மோகன் ஜெயராஜ். கூலித் தொழிலாளி. இவரது மகள் அபிநயா. காரங்காடு அலோசியஸ் மேல்நிலைப்பள்ளியில் 8ம் வகுப்பு பயின்று வருகிறார்.

இந்நிலையில், மகராஷ்டிரா மாநிலம் ரத்னகிரியில் கடந்த 18ம் தேதி முதல் 21ம் தேதி வரை இந்திய விளையாட்டு மேம்பாட்டு ஆணையம் சார்பில் நடைபெற்ற 63வது தேசிய தடகள போட்டியில் தமிழகத்திலிருந்து ஜூனியர் பிரிவில் 64 மாணவ, மாணவியர் பங்கு பெற்றனர்.

இதில் அபிநயா நீளம் தாண்டுதல் மற்றும் 400 மீட்டர் தொடர் ஓட்டப்பந்தயம் ஆகியவற்றில் தங்க பதக்கங்களை வென்றார். இதனை தொடர்ந்து சொந்த ஊர் திரும்பிய மாணவி அபிநயாவிற்கு ஊர் பொதுமக்கள் மற்றும் அலோசியஸ் பள்ளி சார்பில் பேன்ட் செட் முழங்க வரவேற்பு அளிக்கப்பட்டது.

நிகழ்ச்சிக்கு பள்ளி தாளாளர் ஜெனிபர் எடிசன் தலைமை வகித்து, அபிநயாவிற்கு மலர்கிரீடம் அணிவித்தார். தலைமை ஆசிரியர் ஜார்ஜ் மலர்ச் செண்டு வழங்கி வரவேற்றார்.

பெற்றோர் ஆசிரியர் கழக நிர்வாகிகள் செல்வராஜ், வனிதா, இரணியல் காவல் நிலைய ஆய்வாளர் சுதேசன் மற்றும் ஊர் பொதுமக்கள், சக மாணவர்கள் வாழ்த்தினர். தொடர்ந்து அலோசியஸ் ஆலயம் மற்றும் ஊர் அம்மன் கோயிலில் அபிநயா வழிபாடு செய்தார்.

National long jump competition, Marathon: Kumari won achievement by daughter thangapathakang