இதுவல்லவா உண்மையான காதல்: தாய்மைக்கு பின் காதலனைக் கைப்பிடித்த செரீனா வில்லியம்ஸ்!

டென்னிஸ் உலகின் முடிசூடா மகாராணி செரீனா வில்லியம்ஸ் – ரெட்டிட் துணை நிறுவனர் அலெக்சிஸ் ஓகானியான் திருமணம் இன்று நடைபெற உள்ளது. அவர்களது கைக் குழந்தையுடன் இந்தத் திருமணத்தை இவர்கள் செய்து கொள்கின்றனர்.

அமெரிக்காவைச் சேர்ந்த செரீனா வில்லியம்ஸ், 1995ல் சர்வதேச டென்னிஸ் போட்டிகளில் விளையாடத் துவங்கினார். கடந்த, 2002ல் உலகத் தரவரிசையில் முதலிடம் பிடித்தார். 17 ஆண்டுகளில், 8 முறை தரவரிசையில் முதலிடத்தை தக்க வைத்திருந்தார்.

தற்போது, 36 வயதாகும் செரீனா, இதுவரை, 23 கிராண்ட் ஸ்லாம் பட்டங்களை வென்று, அதிக பட்டம் வென்றவர்களில் இரண்டாம் இடத்தில் உள்ளார்.

ரெட்டிட் நிறுவனத்தின் துணை நிறுவனர் அலெக்சிஸ் ஓகானியானும், செரீனாவும் காதலித்து வந்தனர். 2016 டிசம்பரில் திருமணம் செய்வதாக நிச்சயம் செய்து கொண்டனர்.

இந்தாண்டு ஜனவரியில், ஆஸ்திரேலிய ஓபன் போட்டியின்போது, தான் கர்ப்பமாக இருப்பதாக செரீனா அறிவித்தார். ஆஸ்திரேலிய ஓபனை வென்ற பிறகு, சர்வதேச போட்டிகளில் விளையாடாமல் இருந்தார் செரீனா.

கடந்த செப்டம்பர், 1ம் தேதி அவருக்கு பெண் குழந்தை பிறந்தது. அந்த குழந்தைக்கு ஒலிம்பியா என்று பெயர் சூட்டப்பட்டது.

இந்நிலையில், இவர்களின் திருமணம் இன்று நடைபெற உள்ளது, இந்த திருமண விழாவிற்கு மிகவும் நெருக்கமானவர்களுக்கு மட்டுமே அழைப்பு விடுக்கப்பட்டுள்ளது. பாடகி பியான்ஸ், நடிகை மேகன் மார்கெல் உள்பட செரீனாவுக்கு நெருக்கமானவர்கள் பங்கேற்பார்கள் என எதிர்பார்க்கப்படுகிறது. குழந்தையுடன் திருமணம் செய்வது மிகவும் மகிழ்ச்சியான தருணம் என, செரீனா முன்பு கூறியிருந்தார்.