‘கிளப் அணிக்காக மட்டுமே கோப்பை வென்று கொடுப்பார், நாட்டுக்காகக் கோப்பை வென்று கொடுக்க மாட்டார்’ என்ற கடும் விமர்சனத்தைப் பல ஆண்டுகளாகச் சுமந்து வந்த அர்ஜெண்டினா அணி கேப்டன் லியோனல் மெஸ்ஸி, 28 வருடங்களுக்குப் பிறகு கோபா அமெரிக்கா கோப்பையை அர்ஜெண்டினாவுக்கு பெற்றுக்கொடுத்திருக்கிறார்.
மெஸ்ஸி தலைமையில் களமிறங்கிய அர்ஜெண்டினா அணி இத்தொடர் முழுவதும் ஆதிக்கம் செலுத்தி, இறுதிப் போட்டிக்குத் தகுதிபெற்ற நிலையில் நடப்பு சாம்பியன் பிரேசிலும் இறுதிப் போட்டிக்கு முன்னேறியது. போட்டி பிரேசிலின் ரியோடி ஜெனிவாவில் நடைபெற்றது. பிரேசில் தனது சொந்த மண்ணில் விளையாடுவதால் இந்த அணிக்குத்தான் வெற்றி வாய்ப்பு அதிகம் இருப்பதாகக் கருதப்பட்டது.
ஆனால் மெஸ்ஸி தலைமையிலான அர்ஜெண்டினா அணி, ஆரம்பம் முதலே அதிரடி காட்டியது. குறிப்பாக மெஸ்ஸி அட்டாக்கிங் ஷாட்களை அதிகம் அடித்தார். எதிர்தரப்பில் பிரேசிலின் நெய்மரும் கிடைக்கும் பந்துகளைக் கோல்களாக மாற்ற கடும் முயற்சிகளை மேற்கொண்டார். இதனால் ஆட்டத்தில் பெரும் பரபரப்பு நிலவியது. 23ஆவது நிமிடத்தில் அர்ஜெண்டினாவின் ஏஞ்சல் டி மரியோ கோல் அடித்து அசத்தினார். அதன்பிறகு யாரும் கோல் அடிக்கவில்லை. இதனால், அர்ஜெண்டினா அணி வெற்றிபெற்று, 28 ஆண்டுகளுக்குப் பிறகு கோப்பையைத் தட்டித்தூக்கியது.
தற்போது மெஸ்ஸி கடந்து வந்த பாதை குறித்து பார்ப்போம்:- தனிப்பட்ட சாதனைகளைவிட, தேசிய அணிக்காகக் கோப்பை வென்று கொடுப்பதே எனது கனவு, லட்சியம் என மெஸ்ஸி பேசியிருந்தார்.
- 3 முறை கோபா அமெரிக்கா கால்பந்து இறுதிப் போட்டி, ஒரு உலகக் கோப்பை இறுதிப் போட்டியில் அர்ஜண்டினா அணியை வழிநடத்திய மெஸ்ஸியால், அணிக்குக் கோப்பை வென்றுகொடுக்க முடியவில்லை.
- பார்சிலோனா கிளப் அணிக்காகப் பல கோப்பைகளை வென்றுகொடுத்த கேப்டன் மெஸ்ஸியால் தாய் நாட்டிற்குக் கோப்பை வென்றுகொடுக்க முடியாதது ஏனோ? என பலர் கேள்வி எழுப்பி, மெஸ்ஸியை கடுமையாக விமர்சித்தனர்.
- இந்நிலையில் கோபா அமெரிக்கா தொடர் இந்தாண்டு நடைபெற்றது. இதில் மெஸ்ஸி நிச்சயம் கோப்பை வென்றுகொடுக்க வேண்டும். இல்லையென்றால் ஓய்வு அறிவிக்க வேண்டும் என பலர் வலியுறுத்தினர்.
- இதனால், இத்தொடரில் மெஸ்ஸி அட்டாக்கிங் முறையில்தான் விளையாடினார். மொத்தம் 4 கோள்கள் அடித்து கோல்டன் பூட் விருதை வென்றார்.
- இறுதிப் போட்டிவரை அணியைச் சிறப்பாக வழிநடத்தி வந்த இவர், 28 ஆண்டுகளுக்குப் பிறகு அர்ஜண்டினா அணிக்குக் கோபா அமெரிக்க கோப்பையை பெற்றுக்கொடுத்து, சாதனை படைத்துள்ளார்.
- மெஸ்ஸியை திட்டிய விமர்சகர்கள் தற்போது அவரை தூக்கிவைத்துக் கொண்டாடி வருகின்றனர்.
Mobile AppDownload Get Updated News