இந்திய நட்சத்திர பேட்மிண்டன் வீராங்கனை சாய்னா நேவல். சமீபத்தில் முடிந்த ரியோ ஒலிம்பிக் போட்டியில் வலதுகாலில் ஏற்பட்ட காயம் காரணமாக, ஆப்ரேஷன் செய்து ஓய்வில் இருந்தார். இதில் இருந்து முழுமையாக குணமடைந்த இவர், விரைவில் பயிற்சிக்கு திரும்ப உள்ளதாக தெரிவித்திருந்தார்.
இந்நிலையில் சமீபத்தில் நடந்த ஐ.ஓ.சி.,, கூட்டத்தில் விளையாட்டு வீரர்களுக்கான கமிஷனின் உறுப்பினராக சாய்னா தேர்வு செய்யப்பட்டுள்ளார். விளையாட்டு வீரர்களுக்கு கிடைக்கும் அரிய கவுரவமான இது தற்போது சாய்னாவிற்கு கிடைத்தது சர்வதேச அளவில் இந்தியாவிற்கு பெருமை சேர்த்துள்ளது.
இதுகுறித்து ஐ.ஓ.சி., தலைவர் தாமஸ் பாச் கூறியது:
ஐ.ஓ.சி., யின் வீரர்களுக்கான கமிஷனில், இந்தியாவின் சாய்னா நேவல் உறுப்பினராக தேர்வு செய்யப்பட்டுள்ளார். அவரை இந்த பொறுப்பில் நியமிப்பதில் ஐ.ஓ.சி., பெருமைப்படுகிறது.
இவ்வாறு பாச் கூறினார்.
தந்தை மகிழ்ச்சி:
இதுகுறித்து சாய்னா தந்தை ஹார்விர் சிங் கூறியது:
இந்த செய்தியை கேள்விப்பட்டவுடன் மிகவும் உணர்ச்சிவசப்பட்டேன். ஐ.ஓ.சி.,யின் அங்கமாக இருப்பது மிகவும் பெரிய மற்றும் அரிய வகை கவுரவம். சாய்னாவுக்கு காயத்தால் ஒலிம்பிக்கில் பதக்கம் கிடைக்கவில்லை. தற்போது அவரை நினைத்தால் மிகவும் பெருமையாக உள்ளது.
இவ்வாறு அவர் கூறினார்.
Mobile AppDownload Get Updated News