செல்சீ வெற்றி: தொடரும் டுக்கெலின் வெற்றி ஓட்டம்

இங்கிலாந்து நாட்டில் நடைபெற்று வரும் பிரீமியர் லீக் போட்டியில் இன்று அதிகாலை நடை பெற்று முடிந்த ஆட்டத்தில் புள்ளிப் பட்டியலில் நான்காம் இடத்தில் இருக்கும் செல்சீ அணியும் ஐந்தாம் இடத்தில் இருக்கும் எவர்டன் அணியும் மோதின. இவ்விரண்டு அணிகள் மோதிய முதல் ஆட்டத்தில் எவர்டன் அணி 1-0 என்ற கோல் கணக்கில் வெற்றி பெற்றது.


கடந்த சில ஆட்டங்களாக அட்டகாசமாக ஆடி வரும் எவர்டன் அணி கடந்த மூன்று ஆட்டங்களாக தொடர்ந்து வெற்றி பெற்றுள்ளது. மறுமுனையில் செல்சீ அணி புதிய மேலாளர் நியமிக்கப்பட்டதில் இருந்து இன்னும் ஒரு ஆட்டம் கூட தோல்வி அடையாமல் அட்டகாசமாக ஆடி வருகிறது. இதுமட்டுமல்லாமல் இந்த ஆட்டத்தில் வெற்றி பெறுபவர்களுக்கு நான்காம் இடம் என்பதால் ஆட்டத்தில் அனல் பறக்கும் என்று எதிர்பார்க்கப்பட்டது.

கவுண்டர் அட்டாக் முறையில் ஆட்டத்தை அணுகும் எவர்டன் அணி தடுப்பு ஆட்டத்தை துவக்கத்தில் இருந்து உறுதியாக நின்றது. முன்கள வீரர்களான ரிச்சாலிசன் மற்றும் லூவின் ஆகியோர் கவுண்டர் அட்டாக் செய்வதற்காக காத்திருந்தனர். செல்சீ அணி எப்பொழுதும் போல ஆட்டத்தில் ஆதிக்கம் செலுத்தியது. பந்தை அதிக நேரம் தன்வசம் வைத்திருந்த செல்சீ அணி வாய்ப்புகளை சிறப்பாக ஏற்படுத்தவில்லை. செல்சீ அணி மேற்கொண்ட தாக்குதல்கள் எதுவும் விஷம் பொருந்தியதாக இல்லை.

ஆட்டத்தின் 32 ஆவது நிமிடத்தில் அலோன்சோ கொடுத்த கிராஸ்சை ஹாவெர்ட்ஸ் கோல் பக்கம் திருப்பி விட, பந்து எவர்டன் அணியின் காட்ஃப்ரே மேல் பட்டு ஓன் கோலாக மாறியது. முதல்பாதியில் செல்சீ அணி ஏற்படுத்திய மிக அற்புதமான வாய்ப்பு ஆட்டத்தின் 41வது நிமிடத்தில் அலோன்சோவிர்க்கு கிடைக்க அவர் அதை கோலை நோக்கி செலுத்தினார். ஆனால் எவர்டன் அணியின் கோல் கீப்பர் பிக்ஃபோர்ட் அட்டகாசமாக தட்டிவிட்டார். முதல் பாதியின் இறுதியில் செல்சீ அணி 1-0 என்ற கோல் கணக்கில் முன்னிலை பெற்று முடித்தது.


முதல்பாதியில் கடுமையான தடுப்பு ஆட்டத்தில் ஈடுபட்ட எவர்டன் அணி இரண்டாம் பாதியில் தாக்குதல் ஆட்டத்தில் முனைப்பு காட்டியது. முதல் பாதியில் நிதானமாக ஆடிய செல்சீ அணியும் இரண்டாம் பாதியில் தாக்குதல் ஆட்டத்தில் ஈடுபட்டது. இதனால் இரண்டாம் பாதி முழுவதும் சுவாரஸ்யமாக சென்றது. ஆட்டத்தின் 53வது நிமிடத்தில் ஹட்சன் ஒடாய் கொடுத்த கிராஸ்சை தனது நெஞ்சால் கட்டுக்குள் கொண்டுவந்து ராக்கெட் வேகத்தில் கோல் அடித்தார் செல்சீ அணியின் ஹாவெர்ட்ஸ், ஆனால் அவர் தனது நாஞ்சில் பந்தை கட்டுக்குள் கொண்டுவரும் பொழுது அவரது கை பந்தின் மேல் பட்டதால் அந்த கோல் நிராகரிக்கப்பட்டது.

ஆட்டத்தின் 57ஆவது நிமிடத்தில் ரிச்சாலிசன் தனக்கு கிடைத்த அருமையான வாய்ப்பை நழுவவிட்டார். ஆட்டத்தின் 65 ஆவது நிமிடத்தில் செல்சீ அணியின் ஹாவெர்ட்ஸ்ஸை எவர்டன் அணியின் கோல் கீப்பர் தட்டி விட்டதால் செல்சீ அணிக்கு பெனால்டி வழங்கப்பட்டது, இதை எடுக்க முன்வந்த ஜார்ஜின்யோ அதை கோலாக மாற்றி செல்சீ அணியை 2 கோல் முன்னிலை பெறச் செய்தார். தொடர்ந்து தாக்குதல் நடத்திய செல்சீ அணியின் ஸ்ட்ரைக்கர் வெர்னருக்கு 2 அருமையான வாய்ப்புகள் கிடைக்க அவற்றை அவர் நழுவ விட்டார். ஆட்டத்தின் இறுதியில் செல்சீ அணி 2-0 என்ற கோல் கணக்கில் வெற்றி பெற்றது.

இந்த வெற்றியின் மூலம் புள்ளி பட்டியலில் நான்காம் இடத்தை செல்சீ அணி தக்க வைத்துக் கொண்டது. மேலும் புதிய மேலாளர் சொந்த மைதானத்தில் முதல் 5 ஆட்டங்களில் கோல் கொடுக்காமல் இருப்பது பிரீமியர் லீக் வரலாற்றில் இதுவே முதல் முறை.