டிராவில் முடிந்த மாட்ரிட் டெர்பி: பார்சிலோனாவிர்க்கு சாதகமாக அமைந்தது

ஸ்பெயின் நாட்டில் நடைபெற்று வரும் லா லீகா போட்டியில் இன்று அதிகாலை நடை பெற்று முடிந்த ஆட்டத்தில் புள்ளி பட்டியலில் முதலிடத்தில் இருக்கும் அட்லடிகோ அணியும் மூன்றாம் இடத்தில் இருக்கும் ரியல்மாட்ரிட் அணியும் மோதின. இவ்விரு அணிகளும் மோதிய முதல் ஆட்டத்தில் ரியல்மாட்ரிட் அணி 2-0 என்ற கோல் கணக்கில் வெற்றி பெற்றது.

கடந்த சில ஆட்டங்களாக அட்லடிகோ அணிக்கு எதிர்பார்த்த முடிவுகள் கிடைக்காத காரணத்தால் இரண்டு புள்ளிகள் மட்டுமே முன்னிலை பெற்று முதலிடத்தில் உள்ளது, ஆனால் இன்னும் இரண்டு ஆட்டங்கள் எஞ்சியுள்ள நிலையில் இரண்டையும் வெற்றி பெற்றால் எட்டுப்புள்ளிகள் முன்னிலை பெறலாம். மறுமுனையில் ரியல் மாட்ரிட் அணி ஆறு ஆட்டங்களாக தோல்வி அடையாமல் சிறப்பான ஆட்டத்தை வெளிப்படுத்தி வருகிறது, எனவே ரியல்மாட்ரிட் அணியை வீழ்த்துவது அத்தனை எளிதாக அமையாது. இரு அணிகளும் வெற்றி பெற வேண்டும் என்ற முனைப்பில் களமிறங்கினர்.

ஐரோப்பிய கண்டத்தில் அஞ்சக்கூடிய அட்டகாசமான ஆட்டத்தை ஆடிவரும் அணிகளில் அட்லடிகோ ஒரு அணி. தற்போதைய கால்பந்து உலகத்தில் மிகச் சிறந்த தடுப்பு ஆட்டம் கொண்ட ஒரு அணியாக அட்லடிகோ அணி பார்க்கப்படுகிறது. எப்பொழுதும் போல ஆட்டம் துவங்கியதும் சற்று தாக்குதல் ஆட்டத்தில் ஈடுபட்டு முதல் கோல் பதிவு செய்துவிட வேண்டும் என்ற முனைப்பில் தாக்குதல் நடத்தியது அட்லடிகோ அணி. இதன் பலனாக ஆட்டத்தின் 15வது நிமிடத்தில் லொரன்ட்டே கொடுத்த கிராஸ்சை சுவாரஸ் கோலாக மாற்றி அட்லடிகோ அணிக்கு முன்னிலை பெற்றுத் தந்தார்.

மந்தமான ஆட்டத்தை ஏசி மிலான் வெற்றி: மீண்டும் வெற்றிப் பாதைக்கு திரும்புமா?

ரியல் மாட்ரிட் அணி நடத்திய தாக்குதல்கள் அனைத்தையும் அட்லடிகோ அணியின் தடுப்பு ஆட்டம் சிறப்பாக செயல்பட்டு செயலிழக்கச் செய்தது. அட்லடிகோ அணியின் தடுப்பு ஆட்டத்தை மீறி வந்த பந்துகளை அணியின் கோல்கீப்பர் ஒப்லாக் மதில் போன்று செயல்பட்டு கோல் விழாமல் பார்த்துக் கொண்டார். ஆட்டத்தில் 44 ஆவது நிமிடத்தில் அட்லடிகோ அணியின் தடுப்பு ஆட்டக்காரரான ஃபிலிப்பேயின் கையில் பந்து பட்டதாக ரியல்மாட்ரிட் அணி பெனால்டி கோரினர். ஆனால் அவர்களுக்கு பெனால்டி கொடுக்கப்படவில்லை. முதல் பாதி 1-0 என்ற கோல் கணக்கில் முடிவடைந்தது.

முதல் பாதியை போலவே இரண்டாம் பாதி துவக்கத்திலும் அட்லடிகோ அணி தாக்குதல் நடத்தியது. அட்லடிகோ அணியின் கராஸ்க்கோ மற்றும் சுவாரஸ் ஆகியோர் அடித்த பந்தை ரியல் மாட்ரிட் அணியின் கோல் கீப்பர் கோர்ட்டாய்ஸ் பாய்ந்து தடுத்தார். ரியல் மாட்ரிட் அணி சார்பாக வல்வர்ட்டே மற்றும் பென்சீமா ஆகியோர் தங்களுக்கு கிடைத்த வாய்ப்புகளை நழுவ விட ஆட்டம் அட்லடிகோ அணிக்கு சாதகமான முடிவை நோக்கி நகர்ந்தது. ஆட்டத்தின் 87வது நிமிடத்தில் ரியல் மாட்ரிட் அணியின் ஸ்ட்ரைக்கர் பென்சீமா கோல் அடித்து ஆட்டத்தை சமன் செய்தார். முன்னர் இரண்டு அருமையான வாய்ப்புகளை நழுவ விட்ட அவர், இறுதியாக கோல் அடித்து ரியல் மாட்ரிட் அணியை டிரா செய்ய உதவினார். ஆட்டம் 1-1 என்ற கோல் கணக்கில் முடிவடைந்தது.

இந்த ஆட்டத்தை டிரா செய்ததன்மூலம் அட்லடிகோ அணி இரண்டாம் இடத்தில் இருக்கும் பார்சிலோனா அணியை விட 3 புள்ளிகள் முன்னிலை பெற்று முதலிடத்தில் நீடிக்கிறது. மறுமுனையில் ரியல்மாட்ரிட் அணி இரண்டாம் இடத்தில் இருக்கும் பார்சிலோனா அணியின் விட இரண்டு புள்ளிகள் குறைவாகப் பெற்று மூன்றாம் இடத்தில் நீடிக்கிறது. இந்த டிராவின் மூலம் இரு அணிகளும் புள்ளிகளை தவறவிட்டது இரண்டாம் இடத்தில் இருக்கும் பார்சிலோனா அணிக்கு சாதகமாக அமைந்தது.