கடந்த இரண்டு ஆட்டங்களில் தோல்வி அடைந்த யுவென்ட்டஸ் அணி மீண்டும் வெற்றிப் பாதைக்கு திரும்ப கோர்டோனே அணிக்கு எதிரான இந்த ஆட்டம் அருமையான ஒரு வாய்ப்பாக அமைந்தது, ஏனெனில் கோர்டோனே அணி கடந்த 4 ஆட்டங்கள் தோல்வியை தழுவி வருகிறது, மட்டுமல்லாமல் நடப்பு சீசனில் மிக மோசமான ஆட்டத்தை வெளிப்படுத்தி வரும் கோர்டோனே அணி புள்ளி பட்டியலில் கடைசி இடத்தில் தவித்து வருகிறது. இந்த ஆட்டத்தை யுவென்ட்டஸ் அணி வெல்லும் பட்சத்தில் புள்ளி பட்டியல் மூன்றாம் இடத்திற்கு முன்னேறும். வெற்றி பெற வேண்டும் என்ற எண்ணத்தில் களமிறங்கியது யுவென்ட்டஸ்.
ஆட்டம் துவங்கியதும் கோர்டோனே அணி தாக்குதல் நடத்தியது, ஆட்டத்தின் துவக்கத்திலேயே கோல் பதிவு செய்து அதன்பின் தடுப்பு ஆட்டத்தில் ஈடுபட்டு வெற்றி பெரும் முனைப்பில் தாக்குதல் நடத்தினர். ஆட்டத்தின் 8வது நிமிடத்தில் கோர்டோனே அணியின் ரெக்கா அடித்த பந்து கோலில்லிருந்து விலகிச் சென்றது. ஆட்டத்தின் தொடக்கத்திலேயே எதிரணியினரிடத்திலிருந்து தாக்குதலை எதிர்பார்த்திராத யுவென்ட்டஸ் அணி ஆட்டத்தின் வேகத்தை குறைத்தது.
இறுதி நிமிடத்தில் கோல் அடித்து மோகன் பேகன் டிரா: ஹைதராபாத் அணி ஏமாற்றம்
ஆட்டத்தின் 20வது நிமிடத்தில் ராம்சே தனக்கு கிடைத்த வாய்ப்பை நழுவ விட்டார். மீண்டும் நான்கு நிமிடங்கள் கழித்து சாண்ட்ரோ கொடுத்த கிராஸ்சை அவர் தவறவிட ரசிகர்கள் ஏமாற்றமடைந்தனர். ஏற்கனவே இரண்டு அருமையான வாய்ப்புகளை தவற விட்டதன் காரணமாக ஏமாற்றத்தில் இருந்த சமயத்தில் ஆட்டத்தின் 29வது நிமிடத்தில் அணியின் நட்சத்திர வீரர் ரொனால்டோ தனக்கு கிடைத்த அருமையான வாய்ப்பை நழுவ விட ரசிகர்கள் கடும் அதிர்ச்சி அடைந்தனர்.
தான் தவறவிட்ட வாய்ப்புக்கு பரிகாரம் செய்வதாக அமைந்தது 38வது நிமிடத்தில் ரொனால்டோ அடித்த கோல், சான்ட்ரோ கொடுத்த கிராஸ்சை ரொனால்டோ தலையால் முட்டி கோல் அடித்து அணியை முன்னிலை பெறச் செய்தார். சுற்றும் வேகத்தை குறைத்துக் கொள்ளாத அவர் ஆட்டத்தின் 45 நிமிடத்தில் மீண்டும் ஒரு கோல் அடித்து யுவென்ட்டஸ் அணியை 2 கோல் முன்னிலை பெறச் செய்தார். தொடர்ந்து வேகம் காட்டிய அவர் முதல்பாதி முடிவதற்கு முன்னால் அவருக்கு கிடைத்த மற்றொரு வாய்ப்பை நழுவ விட்டார், கடைசியாக அவர் ஹாட்ரிக் அடித்து ஓராண்டுக்கு மேல் ஆகிறது இந்நிலையில் ஹாட்ரிக் அடிப்பதற்கு கிடைத்த அருமையான வாய்ப்பை அவர் நழுவ விட்டார்.
இரண்டு கோல் முன்னிலையுடன் இரண்டாம் பாதியை துவங்கிய யுவென்ட்டஸ் அணி ஆட்டத்தில் நிதானம் செலுத்தியது. பெரிய அளவில் தாக்குதல் ஆட்டத்தில் ஈடுபடவில்லை எனினும் கோர்டோனே அணியின் தாக்குதல்களுக்கு கவுண்டர் அட்டாக் செய்தனர். ஆட்டத்தின் 65வது நிமிடத்தில் கோர்டோனே அணியின் மெசியா அடித்த பந்தை புஃப்ஃபான் தடுக்க கோர்டோனே அணியின் முயற்சிக்கு தக்க பலன் கிடைக்கவில்லை.
அதை தொடர்ந்து மறுமுனையில் யுவென்ட்டஸ் அணி நடத்திய தாக்குதலில் அணியின் இளம் நட்சத்திரமான மெக்கினி கோல் அடித்து யுவென்ட்டஸ் அணியை மூன்று கோல் முன்னிலை பெறச் செய்தார். மூன்று கோல் முன்னிலை பெற்றதும் யுவென்ட்டஸ் அணி தாக்குதல் ஆட்டத்திற்கு செல்வதை குறைத்துக் கொண்டனர். இறுதியாக ஆட்டத்தின் 77-வது நிமிடத்தில் ராம்சேக்கு கிடைத்த வாய்ப்பை அவர் மீண்டும் தவறவிட ஆட்டம் 3-0 என்ற கோல் கணக்கில் முடிவடைந்தது.
இந்த வெற்றியின் மூலம் யுவென்ட்டஸ் அணி புள்ளி பட்டியலில் மூன்றாம் இடத்திற்கு முன்னேறியுள்ளது, மேலும் அவர்களுக்கு எஞ்சியிருக்கும் ஒரு ஆட்டத்தை அவர்கள் வெல்லும் பட்சத்தில் இரண்டாம் இடத்தில் இருக்கும் ஏசி மிலான் அணியை விட ஒரு புள்ளி மட்டுமே பின்தங்கி மூன்றாம் இடத்தில் இருப்பார்கள் என்பது குறிப்பிடத்தக்கது.
Mobile AppDownload Get Updated News