‘ரேப் சர்ச்சை’...‘கணுக்கால் காயம்’.. நெய்மருக்கு ‘டைம்’ சரியில்ல... கோபா அமெரிக்கா தொடரில் இருந்தும் விலகல்!

பிரேசிலியா: கத்தார் அணிக்கு எதிரான நட்பு கால்பந்து போட்டியில் காயமடைந்த பிரேசில் நட்சத்திர கால்பந்து வீரர் நெய்மர் ஜூனியர் கோபா அமெரிக்கா தொடரில் பங்கேற்கமாட்டார் என தெரிவிக்கப்பட்டுள்ளது.

தென் அமெரிக்க நாடுகளுக்கு இடையே நடக்கும் மிகப்பெரிய கால்பந்து தொடரான கோபா அமெரிக்க தொடர் வரும் ஜூன் 14ம் தேதி முதல் ஜூலை 7 ம் தேதி வரை, பிரேசிலின் ரியோ டி ஜெனிரோ, சாவ் பாலோ, பெலோ ஹரிசாண்டே, போர்டா அல்கிரே, சால்வேடார் நகரங்களில் நடக்கிறது.

மொத்தம் 12 அணிகள்:
இதில் அர்ஜெண்டினா, பொலிவியா, பிரேசில், சிலி, கொலம்பியா, ஈகுவேடார், பராகுவே, பெரு , உருகுவே, வெனிசுலா, ஜப்பான், கத்தார் என 4 பிரிவுகளாக 12 அணிகள் பங்கேற்கிறது.

இதில் பிரேசில் அணி கடினமான பிரிவான அர்ஜெண்டினா, 15 முறை சாம்பியனான உருகுவே, இடம் பெற்றுள்ள முதல் பிரிவில் இடம் பெற்றுள்ளது. பிரேசில் அணி தனது முதல் போட்டியில் வரும் ஜூன் 15ம் தேதி பொலிவியா அணியை எதிர்கொள்கிறது.

நெய்மர் காயம்:
இதற்கிடையில் பிரேசில் அணி, கத்தார் அணிக்கு எதிரான நட்பு ரீதியான கால்பந்து போட்டியில் பங்கேற்றது. இதில் 2-0 என பிரேசில் அணி வென்றது. ஆனால் போட்டியின் 20வது நிமிடத்தில் அந்த அணியின் நட்சத்திர வீரர் நெய்மர் காயமடைந்தார்.
வலது கணுக்காலில் ஏற்பட்ட காயம் காரணமாக விலகிய நெய்மரின், காயமடைந்த பகுதியில் மிகப்பெரிய ஐஸ் பாக்கெட் கட்டி, இருவர் அவரை துக்கிச்சென்றனர்.

விலகல்:
இந்நிலையில் அவரின் காயம் குணமாக நீண்ட நாட்களாகும் என்பதால், நெய்மர் கோபா அமெரிக்கா தொடரில் பங்கேற்கமாட்ட என பிரேசில் கால்பந்து கூட்டமைப்பு வெளியிட்டுள்ள அறிக்கையில் தெரிவித்துள்ளது.
பாலியல் சர்ச்சை:
சமீபத்தில் முழங்கால் காயத்தில் இருந்து முழுமையாக குணமடைந்து வந்த நெய்மர் மீது பாரீஸ் ஹோட்டலில் தன்னை பாலியல் பலாத்காரம் செய்ததாக பெண் ஒருவர் குற்றம் சாட்டினார். ஆனால் இதை நெய்மர் மறுத்தார். இருந்தாலும் இது சம்பந்தமான வீடியோ வெளியாகி மிகப்பெரிய சர்ச்சையை ஏற்படுத்தியது.