இந்திய வாலிபால் போட்டியில் சென்னை அணி வெற்றி

கிருஷ்ணகிரியில் நடைபெற்று வரக்கூடிய 14வது அகில இந்திய வாலிபால் பரிசு போட்டிகளில் இன்று நடைபெற்ற லீக் போட்டியில் டெல்லி நார்த் ரயில்வே அணியை வீழ்த்தி சென்னை ஐசிஎப் அணி வெற்றி பெற்றது.

கிருஷ்ணகிரி மாவட்டம் பர்கூர் வாலிபால் கழகம் சார்பில் 14வது அகில இந்திய வாலிபால் பரிசு போட்டிகள் கடந்த 25ம் தேதி பர்கூர் அரசு மகளிர் பள்ளி மைதானத்தில் தொடங்கின. இதில் நாடு முழுவதும் இருந்து ஆண்கள் மற்றும் பெண்கள் பிரிவில் தலா 8 அணிகள் பங்கேற்றுள்ளன.

அனுமதி கட்டணம் பெறக்கூடிய இப்போட்டிகளை பர்கூர் மற்றும் அதனை சுற்றியுள்ள பகுதிகளை சேர்ந்த ஆயிரக்கணக்கான பொதுமக்கள் தினந்தோறும் கட்டணம் செலுத்தி விளையாட்டு போட்டிகளை ஆர்வத்துடன் பார்வையிட்டு வருகின்றனர். தினமும் மாலை 6 மணி முதல் நள்ளிரவு 12 மணிக்குமேல் மின்னொளி வெளிச்சத்தில் நீடிக்கும் இப்போட்டிகளை இருபால் பார்வையாளர்கள் தினமும் வயது வரம்பின்றி மகிழ்ச்சியாக கண்டுகளித்து வருகின்றனர்.

அந்தவகையில் இன்று நடைபெற்ற ஆண்களுக்கான இறுதி லீக் போட்டியில் சென்னை ஐசிஎப் மற்றும் டெல்லி நார்த் ரயில்வே அணிகள் மோதின, இதில் 19-25-23-25-20-25 என்ற செட் கணக்கில் டெல்லி நார்த் ரயில்வே அணியை வீழ்ந்து சென்னை ஐசிஎப் அணி அடுத்த சுற்றுக்கு முன்னேறியுள்ளது.

இறுதிவரை பரபரப்பாக நடைபெற்ற இப்போட்டிகளை ஆயிரக்கணக்கான பார்வையாளர்கள் உற்சாகத்துடன் கைதட்டி மகிழ்ச்சியாக கண்டுகளித்தனர்.

இந்த விளையாட்டு போட்டியில் இறுதியில் வெற்றி பெறக்கூடிய அணிகளுக்கு பல லட்சம் ரூபாய் ரொக்கப் பரிசுகளும் தங்க நகைகளும் பரிசுகளாக வழங்கப்படும் என்பது குறிப்பிடத்தக்கது.