கால்பந்து அணி வெற்றி பெறாது: இந்திய ஒலிம்பிக் சம்மேளனத் தலைவர்

ஆசிய விளையாட்டுப் போட்டிகளில் பங்கேற்க பதக்கம் வெல்லும் வாய்ப்புள்ள விளையாட்டுகளில் மட்டுமே அணி தேர்வு செய்யப்பட்டுள்ளது என்று இந்திய ஒலிம்பிக் சம்மேளனம் கூறியுள்ளது.

18வது ஆசிய விளையாட்டு போட்டிகள் இந்தோனேஷியா நாட்டின் ஜகர்தாவில் ஆகஸ்டு 18 முதல் செப்டம்பர் 2 வரை நடைபெற உள்ளது. இதில் பங்கேற்கும் இந்திய அணியை இந்திய ஒலிம்பிக் சங்கம் செவ்வாய்க்கிழமை அறிவித்தது. 36 வகையான போட்டிகளில் பங்கேற்கும் இந்திய அணியில் 277 வீரர்கள், 247 வீராங்கனைகள் உட்பட 524 பேர் இடம் பிடித்துள்ளனர்.

ஆனால், இந்திய கால்பந்து அணிக்கு சேர்க்கப்படவில்லை. இது குறித்து செய்தியாளர் சந்திப்பு ஒன்றில் பேசிய இந்திய கால்பந்து சம்மேளனம் அதிருப்தி தெரிவித்துள்ளது.

இதற்கு பதிலளித்துள்ள இந்திய ஒலிம்பிக் சங்கத்தின் தலைவர் நரிந்தர் பத்ரா, “யாருடைய தனிப்பட்ட விருப்பத்தின் பேரும் பிடித்த விளையாட்டுகளை மட்டும் தேர்வு செய்யவில்லை. பதக்கம் வெல்ல வாய்ப்புள்ள விளையாட்டுகளில் மட்டுமே அணியைத் தேர்வு செய்துள்ளோம்” என்று கூறியுள்ளார்.

மேலும், “பதக்கம் வெல்லும் வாய்ப்பிருப்பதால்தான் பெனாக் சிலாத் (இந்தோனேஷிய மார்ஷியல் ஆர்ட்ஸ்) போன்ற அதிகம் அறியப்படாத விளையாட்டுகளில்கூட அணியை அறிவித்துள்ளோம்.” என்றும் கூறியுள்ளார்.

ஆண்கள் மற்றும் பெண் ஆகிய இரு பிரிவுகளிலும் இந்திய கால்பந்து அணி ஆசிய விளையாட்டுப் போட்டிகளுக்கான ஒட்டுமொத்த அணியில் தேர்வாகவில்லை. ஆனால், பெனாக் சிலாத் விளையாட்டில் பங்கேற்க 22 பேர் கொண்ட அணி தேர்வாகியுள்ளது. 2016ஆம் ஆண்டில் நடைபெற்ற ஆசிய பெனாக் சிலாத் சாம்பியன்ஷிப் போட்டியில் இந்தியா 2 வெள்ளி, 5 வெண்கலம் உட்பட 7 பதக்கங்களை வென்றது.

இதே போல சம்போ (6 பேர்), சாஃப்ட் டென்னிஸ் (10), குராஷ் போன்ற அதிகமாக பிரபலமாகாத விளையாட்டுகளிலும் இந்தியா பங்கேற்க உள்ளது.