சுஷில் குமாருக்கு 4 ஆண்டுகளுக்குப் பின் முதல் தோல்வி

இந்திய மல்யுத்த வீரர் சுஷில் குமார் கடந்த 4 ஆண்டுகளில் முதல் தோல்வியை சந்தித்திருக்கிறார்.

ஜார்ஜியாவின் திபிலிசியில் நடைபெறும் கிராண்ட் பிரிக்ஸ் மல்யுத்தப் போட்டியில் 74 கிலோ எடைப்பிரிவில் இந்தியாவின் முன்னணி மல்யுத்த வீரர் சுஷில் குமார் பங்குபெற்றார். இவர் இன்று தனது முதல் போட்டியில் போலந்தின் சொகல்ஸ்கியை எதிர்கொண்டார். இதில் சுஷில் 4-8 என்று அதிர்ச்சி தோல்வி அடைந்தார்.

இதன் மூலம் போட்டியிலிருந்து வெளியேறியுள்ள சுஷில், கடந்த 4 ஆண்டுகளில் முதல் தோல்வியைச் சந்தித்திருக்கிறார். முன்னதாக 2014ஆம் ஆண்டு மே மாதம் இத்தாலியில் நடைபெற்ற போட்டி ஒன்றில் பிரான்ஸ் வீரர் லூகா லம்பிஸிடம் கடைசியாக தோற்றிருந்தார்.

35 வயதான சுஷில் குமார் அண்மையில் நடந்து முடிந்த கோல்ட் கோஸ்ட் காமன்வெல்த் போட்டியில் தனது 3வது காமன்வெத் தங்கப் பதக்கத்தை வென்றிருக்கிறார். இதனால் ஆகஸ்டில் தொடங்க உள்ள ஆசிய விளையாட்டுப் போட்டிகளில் பங்கேற்கும் வீரர்களுக்கான தகுதிச்சுற்றிலிருந்து அவருக்கு விலக்கு அளிக்கப்பட்டது.

எனவே, ஆசிய விளையாட்டுப் போட்டிகளைக் கருத்தில் கொள்ளும்போதும் அவரது இன்றைய தோல்வி முக்கியமான பின்னடைவாக பார்க்கப்படுகிறது.