மெஸ்ஸி அணிக்கு மரண அடி: குரேஷியா சாதனை வெற்றி

உலகக் கோப்பை கால்பந்துப் போட்டியில் அர்ஜெண்டினா – குரேஷியா அணிகளுக்கு இடையேயான போட்டியில் குரேஷியா அணி 3-0 என்ற கோல் கணக்கில் அர்ஜெண்டினா அணியை வீழ்த்தியது.

பீபா உலகக் கோப்பை கால்பந்துத் தொடர் ஜூன் 14ஆம் தேதி தொடங்கி ஜூலை 15ஆம் தேதி வரை நடைபெறுகிறது. இதில் செவ்வாய்க்கிழமை நடைபெற்ற 3வது போட்டியில் அர்ஜெண்டினா – குரேஷியா அணிகள் மோதின.

ஆட்டத்தின் முதல் பாதி முடியும் வரை இரு அணிகளும் கோல் போடவில்லை. கிடைத்த ஒரு வாய்ப்பை இரு அணிகளும் தவறவிட்டிருந்தன. ஆனால், இரண்டாவது பாதியில் 53வது நிமிடத்தில் அர்ஜெண்டினா கோல் கீப்பர் வில்லி கபலெரோ செய்த மிகப் பெரிய தவறை கட்சிதமாக பயன்படுத்தி கோலாக மாற்றினார் குரேஷிய வீரர் ரெபிக்.
முதல் கோல் போட்டு முன்னிலை பெற்றதும் அர்ஜெண்டினா அணியை கோல் போட விடாமல் தடுப்பாட்டம் ஆடியது குரேஷியா அணி. ஆனால், 80வது நிமிடத்தில் குரேஷிய வீரர் மாட்ரிக் இன்னொரு அற்புதமான கோலைப் போட்டு அசத்தினார். இதன் மூலம் அர்ஜெண்டினா அணியின் வெற்றி வாய்ப்பு கிட்டத்தட்ட தகர்ந்தது.
ஆட்டத்தின் இறுதி வரை கோலுக்காக போராடிய அர்ஜெண்டினாவுக்கு அடி மேல் அடியாக கொடுத்தனர் குரேஷிய வீரர்கள். கூடுதலாக வழங்கப்பட்ட 4 நிமிடங்களில் முதல் நிமிடத்திலேயே அந்த அணியின் ராகிடிக் மூன்றாவது கோல் அடித்து அர்ஜெண்டினா ரசிகர்களை அதிர்ச்சியில் உறைய வைத்தார்.
இறுதியில் ஆட்ட நேர முடிவில் 3-0 என்ற கோல் கணக்கில் குரேஷியா அணி அபார வெற்றி பெற்றது. அர்ஜெண்டினா அணி கடந்த 60 ஆண்டுகளில் பெற்ற மாபெரும் தோல்வி இது. இதற்கு முன், 1958ஆம் ஆண்டு செக்கோஸ்லோவேகியா அணியிம் 6-1 என்ற கோல் கணக்கில் தோற்றிருந்தது அர்ஜெண்டினா.
இந்த வெற்றியின் மூலம் குரேஷியா அணி நாக்-அவுட் சுற்றுக்கு முன்னேறியுள்ளது. படுதோல்வி அடைந்த அர்ஜெண்டினா அணி நாக்-அவுட் சுற்றுக்குச் செல்வதில் சிக்கல் ஏற்பட்டுள்ளது. அந்த அணி கடைசி லீக் ஆட்டத்தில் நைஜீரியாவை எதிர்கொள்ள உள்ளது.