நிலநடுக்கம் ஏற்படுத்திய மெக்சிகோவின் கோல்!

உலகக் கோப்பை கால்பந்துப் போட்டியில் மெக்சிகோ அணி வீரர் போட்ட கோல் அந்நாட்டில் நில நடுக்கத்தையே ஏற்படுத்திவிட்டது!

பீபா உலகக் கோப்பை கால்பந்துத் தொடர் ஜூன் 14ஆம் தேதி தொடங்கி ஜூலை 15ஆம் தேதி வரை நடைபெறுகிறது. இதில் இன்று நடைபெற்ற ஜெர்மனி – மெக்சிகோ அணிகளுக்கு இடையேயான போட்டியில் நடப்புச் சாம்பியன் ஜெர்மனி அணியை மெக்சிகோ அணி 1-0 என்று தோற்கடித்தது.

இப்போட்டியில் மெக்சிகோ அணி சார்பில் 35வது நிமிடத்தில் கோல் போட்டார் ஹிர்விங் லொசானோ. இந்தப் போட்டியை மெக்சிகோவில் பெருந்திரளாகக் கூடிப்பார்த்துக்கொண்டிருந்த அந்நாட்டு ரசிகர்கள், தங்கள் அணி முதலில் கோல் போடப்பட்டதும் ஆரவாரத்துடன் துள்ளிக்குதித்தனர்.

ஏராளாமானவர்கள் ஒரே நேரத்தில் குதித்த காரணத்தால், லேசான நிலநடுக்கம் ஏற்பட்டதாக மெக்சிகோ அரசு கூறியுள்ளது.