Croatia vs Nigeria: உலகக் கோப்பை கால்பந்து - நைஜீரியாவை வீழ்த்தியது குரேஷியா

காலிங்ராண்ட்: உலகக் கோப்பை கால்பந்துப் போட்டியில் சனிக்கிழமை நடைபெற்ற 4வது ஆட்டத்தில் குரேஷியா அணி நைஜீரியா அணியை 2-0 என்ற கோல் கணக்கில் வீழ்த்தியது.

உலகின் முன்னணி கால்பந்து அணிகள் பங்கேற்கும், பீபா கால்பந்து உலகக்கோப்பை கடந்த ஜூன் 14 ஆம் தேதி, ரஷ்யாவில் கோலாகலமாக தொடங்கியது. ஜூலை 15ஆம் தேதி வரை இந்தக் கால்பந்துத் திருவிழா நடைபெற உள்ளது.

இதில் இன்று 4 போட்டிகள் நடைபெறுகின்றன. இந்திய நேரப்படி நள்ளிரவு 12.30 மணிக்குத் தொடங்கிய 4வது போட்டியில் குரூப் டி உள்ள குரேஷியா மற்றும் நைஜீரியா ஆகிய அணிகள் மோதின. இப்போட்டி காலிங்ராண்ட் நகரில் உள்ள மைதானத்தில் நடைபெற்றது.

இப்போட்டியில் 32வது நிமிடத்தில் நைஜீரியா வீரர் சேம் சைட் கோல் போட்டு குரேஷியா அணியின் கோல் கணக்கைத் தொடங்கிவைத்தார். இந்தப் பின்னடைவு ஈடுகட்ட முயற்சித்த நைஜீரியாவுக்கு குரேஷியா கடுமையான சவாலாக இருந்தது. ஆட்டத்தின் பாதியில் 1-0 என்ற நிலையில் குரேஷியா முன்னிலை வகித்தது.
இரண்டாவது பாதியில் குரேஷிய வீரர் லூகா மாட்ரிக் ஒரு கோல் போட்டு அணிக்கு வலுவான முன்னிலையை அளித்தார். பின்னர், எப்படியாவது கோல் போட்டுவிட வேண்டும் என்று முயற்சித்த நைஜீரியா கடைசி வரை கோல் போடவில்லை.
இரண்டாவது பாதியில் நைஜீரிய வீரர் எகோங் குரேஷிய அணி வீரரை தடுத்து நிறுத்தியதால், குரேஷிய அணிக்கு பெனால்டி கார்னர் வாய்ப்பு அமைந்தது. இது நைஜீரியாவுக்கு பெரிய சறுக்கலாக அமைந்துவிட்டது. இந்த வாய்ப்பை சரியாக பயன்படுத்தி 71வது நிமிடத்தில் குரேஷியா இரண்டாவது கோலையும் பதிவுசெய்துவிட்டது.
இறுதியில் 2-0 என வெற்றி பெற்ற குரேஷியா 1998ஆம் ஆண்டுக்குப் பிறகு உலகக் கோப்பை கால்பந்துத் தொடரின் முதல் போட்டியை வெற்றியுடன் ஆரம்பித்திருக்கிறது.
முன்னதாக இன்று நடைபெற்ற போட்டிகளில் பிரான்ஸ் ஆஸ்திரேலியா 2-1 என வீழ்த்தியது (குரூப் சி). டென்மார்க் பெருவை 0-1 எனத் தோற்கடித்தது (குரூப் சி). அர்ஜெண்டினா - ஐஸ்லாந்து இடையேயான போட்டி 1-1 என டிராவில் முடிந்தது (குரூப் டி).