நியூசிலாந்திடம் மல்லுக்கட்டி வீழ்ந்த இந்திய அணி!

மும்பை: நியூசிலாந்துக்கு எதிரான இண்டர்காண்டினெண்டல் கோப்பை தொடரின் லீக் போட்டியில் இந்தியா அணிகள் போராடி தோல்வியடைந்தது.

ஐக்கிய அரபு எமிரேட்சில் அடுத்த ஆண்டு நடக்கவுள்ள ஆசிய கோப்பை கால்பந்து தொடருக்கு தயாராகும் விதமாக, இந்திய கால்பந்து கூட்டமைப்பு, முதல் முறையாக நான்கு அணிகள் பங்கேற்கும் இண்டர்காண்டினெண்டல் கோப்பை தொடரை முதல் முறையாக இந்தியாவில் நடத்த திட்டமிட்டு அறிவித்தது.

மூன்று கண்டங்கள்:
இதில் தொடரை நடத்தும் அணி என்ற அடிப்படையில் இந்தியா நேரடியாக தகுதி பெற்றது. தவிர பிபா உறுப்பினர்களான சீன தைபே, நியூசிலாந்து, தென் ஆப்ரிக்கா அணிகள் பங்கேற்கிறது.

இந்நிலையில் மும்பையில் நடந்த லீக் போட்டியில் இந்திய அணி, நியூசிலாந்து அணியை எதிர்கொண்டது. போட்டியின் முதல் பாதியில் இரு அணி வீரர்களும் கோல் அடிக்க எவ்வளவு போராடிய போதும், கோல் எதுவும் அடிக்க முடியவில்லை. இதையடுத்து முதல் பாதியின் முடிவில் போட்டி 0-0 என சமநிலை வகித்தது.

சேத்ரி அபாரம்:
பரபரப்பாக துவங்கிய இரண்டாவது பாதியின் ஆரம்பத்திலேயே இந்திய கேப்டன் சுனில் சேத்ரி (46வது நிமிடம்) முதல் கோல் அடித்து கைகொடுக்க, இந்திய அணி 1-0 என முன்னிலை பெற்றது.

இதற்கு போட்டியின் 49வது நிமிடத்தில் நியூசிலாந்து வீரர் டி ஜாங் பதிலடி கொடுத்தார். தொடர்ந்து ஆதிக்கம் செலுத்திய நியூசிலாந்து அணிக்கு 85வது நிமிடத்தில் மற்றொரு கோல் அடிக்க, நியூசிலாந்து அணி 2-1 என முன்னிலை பெற்றது.

இதற்கு கடைசி வரை போராடிய இந்திய அணி வீரர்களால் பதிலடி கொடுக்க முடியவில்லை. இதையடுத்து இந்திய அணி, நியூசிலாந்து அணியிடம் 1-2 என்ற கோல் கணக்கில் தோல்வியடைந்தது.